अमरनाथ महिमा कवि भंवरदान बीठू मधुकर माङवा

दूहा

शिव गिरजां सुत समरते , आळस लगे न अंग ।
दे उक्ति इण दास ने , सांभळ वेण सुचंग ।।
नाग करे निछरावळां , भेळा भूत भङंग ।
उमा निरक्खे ईशवर, धोरी ज चङे धङंग ।।
हर भैळा हुङदंगिया , नाचे भेख नंनंग ।
अमर नाथ इळ ऊपरां , भोळो गटके भंग ।।
अज्जब रचना ईश री , तिजो नेण त्रिकाळ ।
गुफा अन्दर गवरजा , भेळी अरधंग भाळ ।।
शिव लिँग सेवे संत सद् , जग पूजे कर जोङ ।
कुदरत रचना सब कहे , अलख गुफा गिर ओङ ।।

छन्द नाराच

गुफा गिरोङ , तंम तोङ , मंन मोङ मानवी ।
घाटी घमोङ , ठोङ ठोङ, जेथ जोङ जानवी ।।
अरधंग ओङ , बंब बोङ , खोङ खेळ खम्भचे ।
अमरनाथ , जोङ हाथ , नाय माथ , नम्मये ।।
जिये नाम शीश नम्मये ..... ।। 1 ।।

सेवां सकाम , बेल गौम , तीठ नाम तुझरो ।
अज्ञान एट , भाव भेट ,मेल मेट मुझरो ।।
दरश दाय , प्रित पाय , आ उपाय अमये ।
अमरनाथ , जोङ हाथ , नाय माथ , नम्मये ।।
जिये नाम शीश नम्मये ..... ।। 2 ।।

गिरीश गोह , ईश ओह , तेज भ्रोह ताकणी ।
कलंक काट ,फूंक फाट , अद्य वाट आकणी ।।
सोजे सुगन्द , दाट दंद , फंद चाट फम्मये ।
अमरनाथ , जोङ हाथ , नाय माथ , नम्मये ।।
जिये नाम शीश नम्मये ..... ।। 3 ।।

बिच्छू विकार , डंक डार , कंट कार कापिये ।
संभाल सत , मोह मत , गुणी गत गाविये ।।
साचा सतोल , अणमोल , ताय मोल तम्मये ।
अमरनाथ , जोङ हाथ , नाय माथ , नम्मये ।।
जिये नाम शीश नम्मये ..... ।। 4 ।।

अहो अथाग , शेष नाग , काढ झाग काळरा ।
प्रकाश पाप , थिर थाप जेर माप जाळरा ।।
रिझे रुद्राळ , प्रित पाळ , दास भाळ , दम्मये ।
अमरनाथ , जोङ हाथ , नाय माथ , नम्मये ।।
जिये नाम शीश नम्मये ..... ।। 5 ।।

बेठा वडाळ , भूप भाळ , सो सूंडाळ , सुज्जये ।
राजत रिध्द साथ सिध्द पाय निध पुज्जये ।।
विघन टाळ , ले कृपाळ , शुभ भाळ , दम्मये ।
अमरनाथ , जोङ हाथ , नाय माथ , नम्मये ।।
जिये नाम शीश नम्मये ..... ।। 6 ।।

शम्भू सुज्ञान , धर ध्यान , है अज्ञान हंमरा ।
सकव साख , ईश आख भाव राख भंमरा ।।
दालद्य दाट , थाय थाट , है ज वाट हम्मये ।
अमरनाथ , जोङ हाथ , नाय माथ , नम्मये ।।
जिये नाम शीश नम्मये ..... ।। 7 ।।

छप्पय

अमरनाथ धन्य आप , बङा जोगी विकराळा ।
सगला मेट संताप , भाग ज्यू भाळा ।।
अम्ब सती अरधंग सगळा काज सम्भाळा ।
भोला पिवत भंग जग अग रा दुख जाळा ।।
पूतर हम है तुम पिता मुझे भरोसा मातरा ।
कवि भमरो अर्जी करे , पाप हरो सुत पातरा ।।


रचनाकार भंवरदान जी मधुकर माड़वा

टंकणकर्ता दीप चारण (दिलीपसिंह चारण)